စိတ်ချရသော ငြိမ်းချမ်းရေး ဖြစ်စဉ် ဆိုရင်

0

(ခွါနင်း လေသောင်) မြန်မာနိုင်ငံမှာ အစိုးရသစ်တက် လာပြီးနောက် ပိုင်း လက်နက်ကိုင် အားလုံး လိုလိုပင် အပစ်အခတ်ရပ်စဲပြီး ထာဝရငြိမ်းချမ်းရေးဆွေးနွေးပွဲ လုပ်လာခဲ့ကြပါတယ်။ လူထု အခြေပြု လူ့အဖွဲ့အစည်း အတော်များများကလဲ ငြိမ်းချမ်း ဖြစ်စဉ် နှင့် ဆက်စပ်တဲ့ လုပ်ငန်းတွေ ရေး ဆွဲလာခဲ့ကြပါပြီ။ သေချာတာက တကယ့်ငြိမ်းချမ်းရေးကို ဘယ်သူမဆို ကြိုက်ကြ ပါတယ်။ တကယ့် ငြိမ်းချမ်းရေးကို တည်ဆောက်ချင်ကြပါတယ်။ ဒီငြိမ်းချမ်းရေး ဖြစ်စဉ်က တကယ့်ငြိမ်းချမ်းဖက် ဦးမတည်ပဲ စစ်တပ်အပြန်အလှန်စုဆောင်းပြီး လက်နက် အပြန်အလှန်တပ်ဆင်တဲ့ အခြေအနေဖြစ် သွားမှာ အစိုးရိမ်ရဆုံးပါ။ ဆိုလိုတာက ဒီထက်အဆပေါင်းများစွာ ပြင်းထန်သော စစ်ပွဲ အတွက် ပြင် ဆင်မှု ပြုလုပ်မယ်ဆိုရင် ငြိမ်းချမ်းရေး အိမ်မက် ဖြစ်မလာတော့ပဲ တိုင်းပြည် မွမွကြေသွား မှာ ဖြစ်ပါ တယ်။ ဒါကြောင့် လူထုက စိတ်ချရတဲ့ ငြိမ်းချမ်းရေး ဖြစ်စဉ် ဖြစ်ဖို့ အရမ်းအရေးကြီးပါတယ်။ ဒီလိုဖြစ်ဖို့က အရေးကြီးတဲ့ အချက်တွေကို တင်ပြဆွေးနွေးမှာ ဖြစ်ပါတယ်။

စစ်အင်အားလျော့ချခြင်း

စစ်အင်အား လျှော့ချခြင်း ဆိုတဲ့နေရာမှာ တပ်အင်အား၊ လက်နက်အင်အားနှင့် စစ်ရေးလှုပ်ရှား မှုတွေ ပါဝင်ပါတယ်။ လွတ်လပ်ရေးခေတ် မြန်မာ့တပ်မတော် အင်အားဟာ ၄၀၀၀ ပတ်ဝန်းကျင် ကနေ န၀တ၊ နအဖခေတ်မှာ ၄၀၀၀၀၀ ပတ်ဝန်းကျင်အထိ အဆပေါင်းတစ်ရာ တိုးချဲ့လာခဲ့ကြပါ တယ်။ ဒီလောက်တိုးချဲ့လာရခြင်းရဲ့ ရည်ရွယ်ချက်ကလဲ ရှင်းနေတာက တိုင်းရင်းသား လက်နက် ကိုင်တွေနှင့် ဒီမိုကရေစီအင်အားစုတွေကို ချေမှုန်းဖို့အတွက် ဖြစ်ပါတယ်။ ကချင်လွတ်မြောက်ရေး အဖွဲ့နှင့် အခြား တိုင်းရင်းသား လက်နက်ကိုင် အဖွဲ့ တစ်ချို့နှင့် ငြိမ်းချမ်းရေး လုပ်နေတဲ့ အချိန်မှာလဲ အစိုးရဖက်က တပ်အင်အားတိုးချဲ့ခြင်း၊ လက်နက်အင်အား တိုးချဲ့တပ်ဆင်ခြင်းတွေ ပြုလုပ် လာခဲ့ ပါတယ်။ တိုင်းရင်းသားဒေသတွေမှာ တပ်စခန်းများဖြင့် ပြည့်နှက်နေပြီး စစ်ကြောင်းများကို ရွာအနှံ့ ထိုးထားလေ့ ရှိပါတယ်။ အကျိုးဆက် အားဖြင့် တိုင်းရင်းလက်နက်တွေက အစိုးရ အပေါ် အယုံ အကြည် နည်းလာကြပါတယ်။ ကျနော်တို့ကို ငြိမ်းချမ်းရေးလုပ်ခိုင်းပြီး သူက စစ်အင်အားကို တိုးချဲ့ လာမယ်၊ ပြီးရင် ကျနော်တို့ကို အပြတ်တိုက်မယ်လို့ တွက်ဆ လာကြပါတယ်။ အဲဒီ တော့ ငြိမ်းချမ်းရေး အဖွဲ့များအနေဖြင့်လဲ ပြင်ဆင်ပြုလုပ်လာကြပြီး စစ်အင်အားကိုပဲ အပြန်အလှန်တိုး ချဲ့ဖို့ ဖြစ်လာပါတော့တယ်။

ဒီလိုမဖြစ်ဖို့က အစိုးရအနေနဲ့ တိုင်းရင်းသားဒေသတွေမှာ ရှိတဲ့ တပ်စခန်းတွေကို ရုတ်သိမ်းပေး မယ့် အစီအစဉ်ထားရှိသင့်ပါတယ်။ ငြိမ်းချမ်းရေး ဆွေးနွေးမှု အဆင့်အလိုက် တပ်စခန်း လျှော့ချ မယ့် အရေအတွက်ကို တိတိကျကျ ရှိထား သင့်ပြီး လူထုသိအောင်လဲ ကြေညာသင့်ပါတယ်။ အပြန်အလှန်အားဖြင့် တိုင်းရင်းသား လက်နက်ကိုင်တွေကလဲ တပ်အင်အား ဒီထက်မကျော် ဘူးဆိုတဲ့ ကတိတွေ၊ ငြိမ်းချမ်းရေး ဆွေးနွေးမှု အဆင့်အလိုက် သူတို့ရဲ့ စစ်တပ်ရေးရာ မူဝါဒ ဒီလောက်ထိ ပြုပြင်ပြောင်းလဲမယ် ဆိုတာတွေ ရှိထားသင့်ပါတယ်။ အရေးကြီးတာက သူမနာ ကိုယ်မနာ win-win အနေအထားမှာ ရှိကြဖို့ လိုပါတယ်။ ကချင်ပြည် ငြိမ်းချမ်းရေး ဖြစ်စဉ် ကို ပြန်ကြည့်မယ်ဆိုရင် အင်အား တည်ဆောက်တဲ့ ကာလထက် ဘာမှ မပိုခဲ့တာကို တွေ့ရပါတယ်။ ငြိမ်းချမ်းရေးကာလမှာ အစိုးရဖက်ကနေ တတ်နိုင်သမျှ စစ်အင်အား တိုးချဲ့လာခဲ့ပြီး ကချင် လွတ်မြောက်ရေး အဖွဲ့ကလဲ စီးပွါးရေး အင်အားတည်ဆောက်ခြင်းဖြင့် စစ်ရေးအင်အား ပိုမို ခိုင်မာ လာအောင် လုပ်လာခဲ့ပါတယ်။ ၀အဖွဲ့လဲ ထိုနည်း၎င်းပဲ စီးပွါးရေး တောင့်တင်းအောင် လုပ်လာ ခဲ့ခြင်းဖြင့် စစ်အင်အား ကောင်းကောင်း တည်ဆောက်ခဲ့ပါတယ်။ အဲဒါတွေကို သင်ခန်းစာ ယူပြီးတော့ ခုတခေါက် ငြိမ်းချမ်းရေးမှာ အဲသလို ဖြစ်မသွားတော့အောင် စနစ်တကျ စီစဉ် လုပ်ဆောင်သင့်ပါတယ်။

ပြဿနာဖြေရှင်းရန် ယန္တရားတည်ဆောက်ခြင်း

ပဠိပက္ခဖြစ်ပွါးမိပါက ဒီလိုဖြေရှင်းမယ်ဆိုတာလဲ တိတိကျကျ ရှိထားသင့်ပြီး အများပြည်သူ သိအောင် ကြေညာထားသင့်ပါတယ်။ ယန္တရားတစ်ခု တိတိကျကျတည်ဆောက် ထားပြီး ထိရောက်မှုရှိကြောင်းသေချာစေရန် လိုအပ်တဲ့ အာဏာ နှင့် လုပ်ပိုင်ခွင့် ပေးထားရပါမယ်။ ထိရောက်မှုမရှိရင် ဘာမှ အားကိုးလို့ရမှာမဟုတ်ပါဘူး။ ကချင်ပြည် စစ်ပွဲတွေနှင့် ပတ်သက်ပြီး ဥပမာကောင်း ရခဲ့ကြရပါပြီ။ သမတ္တက အမိန့်ထုတ်ကြောင်း မီဒီယာများကတဆင့် ကြားရပေမယ့် ကွင်းပြင် မှာက တိုက်ပွဲက ဆက်ဖြစ်နေတုန်းပါ။ ဘယ်သူ့မှာ တာဝန်ဘယ်လိုရှိတယ်ဆိုတာ သိဖို့ မလွယ်တော့ပါဘူး။ ပဠိပက္ခဖြေရှင်းရေးအဖွဲ့ဟာ သက်ဆိုင်ရာ ပဠိပက္ခအတွက် အာဏာတကယ် ရှိရပါမယ်။ အစွယ်မရှိတဲ့ ကျား၊ ဘာမှ ကိုက်လို့မရ တဲ့ အကောင်တော့ မဖြစ်သင့်ဘူး။ အရေးယူမယ့် ပုံစံကိုလဲ တိကျစွာ ပြဌါန်းထားသင့်ပါတယ်။ အမိန့်ညွန်ကြားချက်ကို မလိုက်နာတဲ့ တပ်မှူးတွေကို ဒီလို ဒီလောက်ထိ ပြစ်ဒဏ်ပေးမယ် ဆိုတာရှိသင့်ပါတယ်။ ဒါမှမဟုတ်ရင် ရှေ့တန်းက တပ်မှူးတွေ က ဟိုအကြောင်းပြ ဒီအကြောင်းပြနဲ့ ကြိုက်သလို လူလည်လုပ်နိုင်ပါတယ်။ အမိန့်က အောက်ခြေ မရောက်သေးလို့ ဆိုတဲ့ အကြောင်းပြချက်တွေ ဖြစ်မလာအောင် ဆက်သွယ်ရေးစနစ် သေချာစေရ မယ်၊ ဆက်သွယ်ရေးစနစ် မကောင်းတဲ့ နေရာမှာ လှုပ်ရှားမှုတွေ ရပ်စဲ ပေးရမှာ ဖြစ်ပါတယ်။

တစ်ခုခုဖြစ်မိလို့ရှိရင်လဲ လူထုကို အတတ်နိုင်ဆုံးကာကွယ်ပေးရန် ကရင်အမျိုးသားအစည်းအရုံးက စတင်ဆွေးနွေးလာခဲ့တဲ့ military code of conduct စစ်တိုက်တယ် ဆိုရင်လဲ ဒီလိုနည်းနဲ့ တိုက်ရ မယ်ဆိုတဲ့ သဘောတူညီမှုလဲ ရှိထားသင့်ပါတယ်။ အဲဒီ သဘောတူညီချက်နှင့် လိုအပ်တဲ့ ပညာပေး မှုကို သက်ဆိုင်ရာ တပ်မှူး တပ်သားတွေ အကုန်လုံးထံ ရှင်းပြပေးရမှာ ဖြစ်ပါတယ်။ ကျနော်တို့ တပ်မှူးတွေက မသိလို့ပါ ဆိုတဲ့ ဖြောင့်ချက်လောက်နဲ့ ပြဿနာ ဖြေရှင်းဖို့ မသင့်ပါဘူး။ အဲဒီတော့ အကောင်းဆုံးက စစ်တပ်မှာ တကယ့် အာဏာရှိတဲ့ လူကြီးတွေ၊ ပါတီမှာ တကယ့် အာဏာရှိတဲ့ လူကြီးတွေ၊ အရပ်ဖက်ကလဲ တကယ့် အလုပ်လုပ်နိုင်တဲ့ လူကြီးတွေ ပါဝင်တဲ့ ယန္တရားတစ်ခု ဖြစ် သင့် ပါတယ်။ စစ်မက်ဖြစ်ပွါးတဲ့နေရာမှာ လူထုဘ၀ လုံခြုံမှုကို အတတ်နိုင်ဆုံး ကာကွယ်ပေးထားရ ပါမယ်။

ငြိမ်းချမ်းရေးဖြစ်စဉ်မှာ လူထုအခန်းကဏ္ဍ မြင့်တင်ခြင်း

ငြိမ်းချမ်းရေးကို အစဉ်တစိုက် တောင့်တလာခဲ့ကြတဲ့ လူထုရဲ့ အခန်းကဏ္ဍကိုလဲ အတတ်နိုင် ဆုံး မြင့်တင် ရပါမယ်။ လူထုမှာ တစုံတရာ ပါဝါရှိမှ ငြိမ်းချမ်းရေး တည်တံ့လာနိုင်မှာ ဖြစ်ပါတယ်။ လူထုရဲ့ ဆုံးဖြတ်ချက်က တစုံတရာ ထိရောက်မှု မရှိခဲ့ရင် လက်နက်ကိုင်အချင်းချင်းဟာ မခံနိုင် တာပဲ သိမယ်။ အကြောင်းပြချက်ဒလဟော ရှိထားကြမယ်။ ဆက်တိုက်ဖို့ပဲ စဉ်းစားကြဖို့ များတယ်။ လူထုအမြင်ကို ပေတံအနေနဲ့ သတ်မှတ်ပြီး သူတို့ လမ်းပြမှုအတိုင်း သွားနေ မယ်ဆိုရင် ငြိမ်းချမ်းရေး က ပျက်စရာ မရှိဘူးလို့ ယုံပါ တယ်။ လူထုက ဘယ်သူ့ဖက်မှာပဲ ပါပါ သေချာတာက တိုက်ပွဲကို လက်ခံမှာ မဟုတ်ပါဘူး။ ငြိမ်းချမ်းတဲ့နည်းနဲ့ ဖြေရှင်းဖို့ပဲ အမြဲ ဖိအားပေးလာမှာ ဖြစ် ပါတယ်။ လူထု အခန်း ကဏ္ဍက တစုံတရာ မြင့်တက်လာမှပဲ လက်နက်ကိုင် အဖွဲ့တွေအနေနဲ့ လူထုကို လေးစားပြီး လူထုထောက်ခံမှု ရရှိလာအောင် အပြန်အလှန် ကြိုးစားလာကြ မှာ ဖြစ်ပါ တယ်။ ငြိမ်းချမ်းရေးဖြစ်စဉ် အပေါ် လူထုအမြင် ဆွေးနွေးပွဲတွေကို ကြီးကြီး ကျယ်ကျယ် အားပေး ရပါမယ်။ လူထုရဲ့ သဘောထားအမြင်တွေဟာ ပါတီတွေရဲ့ မူဝါဒများကို လိုအပ်သလို ပြုပြင်ပြောင်း လဲနိုင်တဲ့ အခြေအနေ ရှိရပါမယ်။ ဒီလို ဖြစ်လာအောင်လဲ လူထုက တွန်းအားပေးရမယ်။

လူထုလှုပ်ရှားမှုက formal ပုံစံဖြင့်တမျိုး informal ပုံစံဖြင့်တဖုံ ပုံစံအမျိုးမျိုးဖြင့် တည်ရှိရပါမယ်။ အမြင်တွေက ပိုကျယ်ပြန့်လာစရာ ရှိပါတယ်။ Formal ပုံစံတစ်ခုတည်းကိုသာ လုပ်ဆောင် သွားမယ် ဆိုရင် အားနည်းချက်က ရှိလာနိုင် တယ်။ အစိုးရလူ၊ လက်နက်ကိုင် အဖွဲ့လူ ဆိုပြီး တိတ်တခိုး အမြင်ကွဲပြားမှု ရှိလာနိုင်တယ်။ Informal ပုံစံတွေက အားသာသွားနိုင်တဲ့ အချက်တွေလဲ ရှိပါတယ်။ သူတို့ သိရှိတာက ပိုပြီး ကျယ်ပြန့်မသွားနိုင်ပေမယ့် formally လုပ်ဆောင် တဲ့ လူတွေ မသိတတ် ဟာတွေကို သူတို့ တွေ့မြင် သိရှိသွားနိုင်ပါတယ်။ ဒီနည်းနဲ့ သူတို့က တိုင်းပြည် ငြိမ်းချမ်းရေးအတွက် contribution အကြီးကြီး ပေးသွားနိုင်ပါတယ်။ ရှင်းရှင်းပြောရရင် MPC နှင့် တခြား ငြိမ်းချမ်းရေး စောင့်ကြည့်ရေး အဖွဲ့တွေထဲနှင့် မလုံလောက်ပါ။ စိတ်ဝင်စားသူတွေ အားလုံးက ကိုယ့်အဖွဲ့ကိုယ်စီနှင့် လုပ်လာနိုင်ခွင့် ရှိရပါမယ်။ သေချာတာက အစိုးရ ဒါမှမဟုတ် လက်နက် ကိုင်အဖွဲ့တွေရဲ့ သြဇာလွမ်းမိုးမှုက informal အဖွဲ့တွေမှာ ပိုပြီးတော့ ကင်းရှင်း သွားမှာပါ။ အဲဒီတော့ သမ္မာသမ ပိုကျသွားမှာ ဖြစ်ပါတယ်။ တကယ့် လူထုအမြင်ကိုလဲ ပိုပြီး ကိုယ်စားပြုနိုင်ကြမှာ ဖြစ်ပါ တယ်။

အုပ်စုတွေအကြား အယုံအကြည်တည်ဆောက်ခြင်း

အစိုးရနှင့် လက်နက်ကိုင်တွေအကြား သော်လည်းကောင်း၊ လက်နက်ကိုင် အချင်းချင်းကြား သော် လည်းကောင်း ဒီအစီအစဉ်ကို ငွေကုန်ကြေးကျများရင် များပါစေ အရေး တကြီး လုပ်ဆောင်သွား သင့်ပါတယ်။ တွေ့ဆုံဖန်များလာမယ်၊ ရင်းနှီးမှုပိုရှိလာမယ်၊ တစ်ယောက်အကြောင်းတစ်ယောက် ပိုပြီးလေ့လာသိရှိလာမယ်၊ အချင်းချင်းကြား သံဇောယဉ်တွေ ပိုရှိလာကြမယ် ဆိုရင် တိုင်းပြည်ရဲ့ ငြိမ်းချမ်းရေး ဆွေးနွေးပွဲက ပိုပြီး လွယ်ကူ ချောမောလာမှာ ဖြစ်ပါတယ်။ ရုရှား သမတ္တ ဂိုဘားချော့ဗ် က စားပွဲကို စောင့်ကန် လိုက်တော့ လူတွေထင်တာက နောက်ဆို နျူးကလီးယားနဲ့ ချမယ်တဲ့။ သားဖြစ်သူက ပြောလာတဲ့အခါ သူဆိုလိုတာ အဲဒါမဟုတ်ပဲနဲ့ အနောက်တိုင်း စတိုင်ကို သင်ယူ အသုံးပြု သွားတာ ဖြစ်မှန်း သိရတယ်လေ။ အယုံအကြည် တည်ဆောက်မှုအားနည်းလို့ ရှိရင် ပြော ဆိုဆွေးနွေးတာကော ဟန်ပန်အမူအယာအထိ ကိုယ်ဖြစ်ချင်တာ တမျိုး သူများ နားလည်တာ တခြားဖြစ်သွားပြီး လိုရာခရီး မရောက်ပဲ ရှိကြမှာ မလွဲပါ။

တိုင်းပြည်ပြဿနာက ကြာလဲကြာနေပြီဖြစ်တဲ့အတွက် အချိန်ယူပြီး ယုံကြည်မှုက တည်ဆောက်ဖို့ လိုပါမယ်။ လက်နက်ကိုင် အုပ်စုအချင်းချင်းကြားလဲ မယုံသင်္ကာဖြစ်မှုတွေ တစတစ ကြီးလာနေပြီ ဆိုတော့ ပြီးတော့ ပွင့်လင်းတဲ့ လူ့ အသိုင်းအ၀ိုင်းကို ဆုံးရှုံးရတာ ကြာနေပြီးဖြစ်တဲ့အတွက် တစ်ခါ တည်း ပွင့်ပွင့်လင်းလင်း ပြောဆိုဖို့က မဖြစ်နိုင်တော့ တဲ့အတွက် ပိုပြီး အချိန်ယူသင့်ပါတယ်။ လူမျိုးတမျိုးနဲ့တမျိုးကြားမှာလဲ အယုံအကြည် တည်ဆောက်မှုက မရှိရင် လက်နက်ကိုင် တိုက်ခိုက်ဖြေ ရှင်းတာပဲ တတ်လာခဲ့ပြီဆိုတော့ တိုင်းပြည်က ငြိမ်းချမ်းမှာ မဟုတ်ပါဘူး။ ကျနော်တို့ လူမျိုးတွေကလဲ ဒီမြေဒီရေထဲမှာ ရောပြီးတော့ နေထိုင်လာကြတာကိုး။ ကိုယ့်လူထု သူ့လူထု ဆိုပြီး ဘာမဟုတ် အကြောင်းတွေနဲ့လဲ ရန်ပွဲဖြစ်ကာ စစ်မီးပြန်လောင်သွားနိုင်ပါတယ်။ တကယ်လို့  ပြည်နယ်တွေရဲ့ နယ်နိမိတ်တွေ ပြန်လည် review ကြမယ်ဆိုရင် ပိုပြီး သတိထားရပါ မယ်။ လုံလောက်သော ယုံကြည်မှုနှင့် ခင်မင်ရင်းနှီးမှု မရှိရင်တော့ လွယ်လွယ်ကူကူပဲ ရန်သူဖြစ် သွားကြမှာပါ။ အရေးကြီးတာက ယုံကြည်တည်ဆောက်တဲ့ကာလမှာ အငြင်းပွါး ဖွယ်ရာများ မဆွေးနွေးမိဖို့ ဖြစ်ပါတယ်။

နိုင်ငံတကာရဲ့ ၀င်ရောက်ပံ့ပိုးမှု ရယူခြင်း

ပြည်တွင်းရေးပဲ ဖြစ်ဖြစ်ပေါ့ တိုင်းပြည်အတွက် ကောင်းကျိုးကို မျှော်ကိုးပြီးတော့ နိုင်ငံတကာရဲ့ ငြိမ်းချမ်းရေး အတွက် ၀င်ရောက်ပံ့ပိုးမှုကို ရယူသင့်ပါတယ်။ သူတို့အနေနဲ့ ပြည်တွင်းရေးကို လာရောက်စွက်ဖက်တာ မဟုတ်ပဲ မိမိတို့ ကိုယ်တိုင်က လှိုက်လှဲစွာ ဖိတ်ခေါ်တာ ဖြစ်သင့်ပါတယ်။ တချို့နိုင်ငံတွေကို အစာမကြေနိုင်လို့ ရှိရင်လဲ ကြားနေ နိုင်ငံတွေကို ရွေးချယ်သင့်ပါတယ်။ ဥပမာ အားဖြင့် အမေရိကန်တို့လို တရုတ်တို့လို နိုင်ငံတွေဟာ နှစ်ခုစလုံး ပါဝင် လာနိုင်ရင် ပိုကောင်းပါ တယ်။ တစ်ခုခုသာ ပါဝင်ခိုင်းမယ် ဆိုရင် အချင်းချင်းကြား မကျေမခြမ်းဖြစ်နိုင်ပါတယ်။ အဲဒါတော့ လူတိုင်း သိမယ် ထင်ပါတယ်။ ခုလဲ နိုင်ငံတကာ ပါလာတာပဲ ပြောစရာ ရှိတယ်၊ ကျနော်ပြော ချင်တာက ခု နိုင်ငံတကာ ပါဝင်မှု ဆိုတာက ရံပုံငွေပေးတဲ့ အနေအထားလောက်မှာပဲ ဖြစ်ပါတယ်။ တာဝန်ယူမှု မရှိပါဘူး။ သူတို့ကိုယ်တိုင်က စားပွဲမှာ ပါလာတာကို ကျနော် ပြောချင်တာ ဖြစ်ပါတယ်။ တာဝန်ယူမှု တစုံတရာလဲ ရှိလာရမယ်။ ဒီဟာ ပျက်သွားရင် သူတို့ရဲ့ အားနည်းချက်ကြောင့် လို့လဲ ပြောလို့ ရတဲ့ အနေအထားအထိ သူတို့ ပါဝင်မှုက အရေးကြီးရပါမယ်။

နိုင်ငံတကာ ပါလာခြင်းအားဖြင့် နှစ်ဦးနှစ်ဖက်ကြား အတွေးအခေါ်တွေ တော်တော် ပြောင်းလဲ လာနိုင်စရာ ရှိပါတယ်။ ကိုယ့်ဟာကိုယ်ပဲ ဆိုတဲ့ အတွေးက ကောင်းတဲ့အချိန်မှာ အရမ်းကောင်း သလို မှောက်တဲ့ အချိန်ကျရင် အဖတ် ဆယ်မရ ဖြစ်သွားနိုင်ပါတယ်။ ပြီးတော့ မြန်မာပြည် ငြိမ်းချမ်း ဖို့က တကမ္ဘာလုံးမှာ တာဝန်ရှိပါတယ်။ သူတို့ ပြည်တွင်းရေး ပဲ ဆိုပြီးတော့ လက်ပိုက်ကြည့်ကြမယ် ဆိုရင် ကမ္ဘာငြိမ်းချမ်းရေးဆိုတာ ဖြစ်နိုင်မှာ မဟုတ်ပါဘူး။ ကျနော်တို့ မြန်မာ နိုင်ငံသားတွေဟာလဲ ကမ္ဘာနှင့်တန်းတူ ရင်ဘောင်တန်းမယ့် လူတွေပဲလေ။ သူတို့နှင့်အတူ အလုပ်လုပ်နိုင်ရမှာပေါ့။ တိုးတက်တဲ့နိုင်ငံတွေမှာတောင် ပြဿနာရှိရင် အကူအညီတောင်းကြတာပါပဲ။ မိသားစု စိတ်ဓါတ်ရှိ ထားသင့်တယ်။ လုပ်သင့်လုပ်ထိုက်တဲ့ အလုပ်လို့ပဲ မြင်ပါတယ်။

အထက်ပါ အချက်တွေဟာ လိုလေသေးမရှိ လုံလောက်တဲ့ အချက်တွေ မဟုတ်ပေမယ့် အဲသလို သာ သွားနိုင်တယ် ဆိုရင် လူထုက တကယ် ယုံကြည်စိတ်ချရတဲ့ ငြိမ်းချမ်းရေး ဖြစ်စဉ်တော့ ဖြစ်နေ မှာပါ။ လူထုကလဲ တကယ် အားပေး လာမှာ ဖြစ်ပါတယ်။ ခုက အချင်းချင်းကြားမှာ သံသယတွေ ရှိနေကြမှာ သေချာသလို လူထုကလဲ စိတ်ချယုံကြည်ဖို့ တကယ်ကို ခက်တဲ့ အနေအထားမှာ ရှိပါ တယ်။ ကချင်ပြည်မှာ တိုက်ပွဲတွေကလဲ ဆက်လက်ဖြစ်ပွါးနေတယ် ဆိုတော့ ပိုပြီးတော့ သံသယ စိတ်က ကြီးထွားလာတော့တာ ပါပဲ။ ဒါကြောင့် စာရေးသူအနေနဲ့ အစိုးရကိုကော လက်နက်ကိုင် အဖွဲ့တွေကိုပါ လူထု စိတ်ချတဲ့ ငြိမ်းချမ်းရေးဖြစ်စဉ် ဖြစ်အောင် လုပ်ပေးကြပါလို့ တောင်းဆိုရင်း နိဂုံးချုပ်လိုက် ပါရစေ။

Share.

About Author

Comments are closed.