ချင်းပြည်နယ် တ၀ှမ်းရှိ ရွာသူရွာ သားများမှ ဖွံ့ဖြိုးတိုးတက်ရေး လုပ်ငန်း စဉ်များ အတွင်း ပူးပေါင်းပါဝင်ခွင့် ပိုမိုရ ရှိစေရန် တောင်းဆိုခြင်း

0

ကျေးရွာ(၄၁)ရွာမှ ရွာသူရွာသား (၁၀၀) ကျော် တို့သည် ချင်းပြည်နယ် မြောက်ပိုင်း၊ အလယ်ပိုင်းနှင့် တောင်ပိုင်းအသီးသီးတွင် ကျင်းပပြုလုပ်သည့် ရပ်ရွာလူထုဖွံ့ဖြိုးရေး တွေ့ဆုံပွဲများ သို့ တက်ရောက်ပြီး ဖွံ့ဖြိုးတိုးတက်ရေးလုပ်ငန်းများတွင် လူထုပိုမိုပါဝင်ရန် တောင်းဆိုလိုက်သည်။

 

ချင်းလူထုဖွံ.ဖြိုးရေးကွန်ယက်အဖွဲ့အစည်းက ဦးဆောင်ကျင်းပပြုလုပ်ခဲ့သော လူထုဖွံ့ဖြိုးရေး ဆွေးနွေးပွဲ ကို ၂၀၁၃ခုနှစ်၊ ဇွန်လ(၂၁-၂၂)ရက်နေ့တွင် ချင်းပြည်နယ်မြောက်ပိုင်း တီးတိန်မြို.နယ်၊ ငင်းသဲ ကျေးရွာတွင်လည်းကောင်း၊ ဇူလှိုင်လ(၁၂-၁၃)ရက်နေ့တွင် ချင်းပြည်နယ် အလယ်ပိုင်း ထန်တလန် မြို့နယ် ဘဲလ်ဟာရ်ကျေးရွာတွင်လည်းကောင်း၊ ဇူလှိုင်လ (၃-၄ )ရက်နေ့တွင် ချင်းပြည်နယ် တောင်ပိုင်း ပလက်ဝမြို့နယ် ကာရာမိတ်ကျေးရွာတွင်လည်းကောင်း (၃)နေရာ၌ ကျင်းပပြုလုပ်နိုင်ခဲ့သည်။

 

လက်ရှိ ချင်းပြည်နယ်အတိုင်းအတာဖြင့် အစိုးရနှင့် သက်ဆိုင်ရာကုမ္ပဏီအမျိုးမျိုးတို့ ပူးပေါင်းပြီး ဒေသ ခံပြည်သူလူထု၏ စိုးရိမ်မှုများကို အလေးထားစဉ်းစားပေးခြင်းမရှိဘဲ မြွေတောင်နီကယ် သတ္တုတွင်း စီမံကိန်း၊ လေမျို ရေကာတာစီမံကိန်း၊ ကုလားတန် ဖက်စုံပို့ဆောင်ဆက်သွယ်ရေး စီမံကိန်း၊ နတ်မ တောင်အမျိုးသားဥယျာဉ် စီမံကိန်းနှင့် မဏိပူရရေကာတာစီမံကိန်းများကို အကောင်အထည်ဖော် လျက် ရှိကြပါသည်။

 

လက်ရှိ ဖွဲ့စည်းပုံအခြေခံဥပဒေထဲတွင် ထုံးတမ်းစဉ်လာမြေယာပိုင်ဆိုင်မှုစနစ်များကို အသိအမှတ်ပြု ပေးခြင်းမရှိခြင်းနှင့် ဘိုးစဉ်ဘောင်ဆက်ခေတ်အဆက်ဆက် မိသားစုပိုင်ဆိုင်လာခဲ့ကြသည့် မြေယာ များကို လျော်ကြေးတပြားတချပ်မျှခံစားရရှိခြင်းမရှိဘဲ သိမ်းဆီးခြင်းခံခဲ့ကြရပါသည်။ ယခုလိုဖြစ် ပျက်ခြင်းမှတဆင့် ချင်းပြည်သူလူထုတို့ ဆက်လက်အသက်ရှင်ရပ်တည်နိုင်ရေးအတွက် အခက်အခဲ များ ပေါ်ပေါက်စေပါသည်။

 

ပြည်တွင်းနှင့်နိုင်ငံတကာ အင်ဂျီအို တော်တော်များများသည်လည်း ချင်းပြည်နယ်ကျေးရွာများတွင် ၀င်ရောက် ကူညီလာခဲ့ကြရာတွင် ၄င်းတို့လုပ်ငန်းအစီအစဉ်များထဲ လူထုပါဝင်မှု၊ ရေရှည် တည်တံ့ ခိုင်မြဲမှုနှင့် လူထုပိုင်ဆိုင်မှု အခြေခံမူများကို လေးစားလိုက်နာရန် ပျက်ကွက်ခဲ့ကြသည်။ ၄င်းတို့၏ လုပ်ငန်းအစီအစဉ်များသည် အထက်-အောက် လုပ်ငန်းသဘောဆန်ပြီး ချင်းရပ်ရွာလူ့အသိုင်းအ၀န်း အကြား မှီခိုအားထားလိုခြင်းကို ဖန်တီးပေးသည့် စိုးရိမ်မှုအန္တရယ်တရပ်ဖြစ်ပါသည်။

 

လက်ရှိ ကျေးရွာနှင့် ရပ်ကွက်အုပ်ချုပ်ရေး အက်ဥပဒေအရ ရွာသားများကို လွတ်လပ်မှု ကန့်သတ်ကာ မည်သည့် လှုပ်ရှားမှုအတွက်မဆို ပွဲမိန့်တောင်းခံခြင်း၊ အဆိုပါ ပွဲမိန့်အတွက် ရဲစခန်းနှင့် ကျေးရွာ (၀ါ) ရပ်ကွက် အုပ်ချုပ်ရေးမှူးများ၏ ထောက်ခံချက်ရယူခြင်းပြုလုပ်စေခြင်းဖြင့် လွတ်လပ်စွာလှုပ်ရှား ဆောင်ရွက်ပိုင်ခွင့်ကို ချုပ်ခြယ်ထားပါသည်။

 

ထို့ကြောင့် မြန်မာနိုင်ငံအစိုးရ အနေဖြင့် ပြည်သူလူထုကို ကာကွယ်အကျိုးပြုရန်အတွက် အောက်ပါအ တိုင်း အလေးအနက် တောင်းဆိုလိုက်ပါသည်။

 

1)     ကုလသမဂ္ဂ ဌါနေတိုင်းရင်းသားလူမျိုးစုများဆိုင်ရာ အခွင့်အရေးကြေညာစာတမ်းအရ (Free Prior Informed Consent – FPIC)အခြေခံမူဖြင့်  စနစ်တကျစီမံကိန်းများကို အကောင် အထည်ဖော် ဆောင်ရွက်ရမည်။

 

2)    ချင်းအမျိုးသားတို့၏ ဘိုးဘွားစဉ်ဆက် ကျင့်သုံးလာခဲ့သော ထုံးတမ်းစဉ်လာ မြေယာပိုင်ဆိုင်မှု နှင့် စီမံခန့်ခွဲမှုစနစ်များကို အသိအမှတ်ပြုရန်အတွက် ဖွဲ့စည်းအုပ်ချုပ်ပုံအခြေခံဥပဒေတွင်  ပြင် ဆင်ပြဌါန်းရမည်။

 

3)    ဖွံ့ဖြိုးရေးလုပ်ငန်းစဉ်တိုင်းတွင် လူထုပါဝင်မှု၊ ရေရှည်တည်တံ့မှု၊ လူထုပိုင်ဆိုင်မှုအခွင့်အရေး များကို ဖွဲ့စည်းပုံအခြေခံဥပဒေတွင် အာမခံချက်ပေးရမည်။

 

4)    လူထုအခြေပြု လူ့အဖွဲ့အစည်းများနှင့် အခြားလူမှုရေးအဖွဲ့အစည်းများကို လွတ်လပ်စွာလှုပ်ရှား ခွင့်နှင့် လုပ်ငန်းဆောင်ရွက်ခွင့်ပေးရမည်။

 

ဆက်သွယ်ရန် ပုဂ္ဂိုလ်

 

ဆလိုင်း ဆိုင်းမွန်

ဖုန်း     +၉၁၈၇၃၁၉၁၄၇၀၁

အီးမေးလ် လိပ်စာ- nccd.chinland@gmail.com

မှတ်ချက်။ ဤတောင်းဆိုချက်ကို www.khonumthungburmese.org နှင့် www.nccdburma.wordpress.com တို့တွင် ရယူနိုင်ပါသည်။

Share.

About Author

Comments are closed.