တိုက်ပွဲကြောင့် ဒဏ်ရာရရှိသည့် ရက္ခိုင့်တပ်မတော် တပ်သား ၃ ဦး မီဇိုရမ်ဘက်သို့ ဆေးရုံတင်ထားရ

0

ချင်းပြည်နယ် ပလက်ဝမြို့နယ် အိန္ဒိယ-မြန်မာနယ်စပ်ဘက်တွင် မြန်မာ့တပ်မတော်နှင့် တိုက်ပွဲဖြစ်ပွားနေသော ရက္ခိုင့်တပ်မတော်မှ တပ်သား ၃ ဦးသည် မီဇိုရမ်ပြည်နယ် လောင်တလိုင်မြို့ဘက်သို့ ထွက်ပြေးပြီး Christian ဆေးရုံတွင် တင်ထားရသည်ဟု မီဇိုရမ်သတင်းဌာန DDK (Doordarshan Kendra Aizawl) တွင်ဖော်ပြထားသည်။

လောင်တလိုင်ရဲစခန်းမှ တာဝန်ရှိသူများ၏ ပြောဆိုချက်အရ ယခုရက်ပိုင်းအတွင်းဖြစ်ပွားလျက်ရှိသည့် တိုက်ပွဲအတွင်း ဒဏ်ရာရရှိလာကြသည့် ရက္ခိုင့်တပ်မတော်မှ ထွန်းထွန်း(၃၅)၊ ကျော်ကျော်(၂၇) နှင့် အောင်အောင်(၂၁) တို့သည် မီဇိုရမ်ပြည်နယ် နယ်စပ်ရွာ Hmawngbuchhuah ကျေးရွာအထိ လှေဖြင့် ထွက်ပြေးလာခဲ့ကြပြီး ထိုမှတဆင့် Maxi cab ကားဖြင့် လောင်တလိုင်မြို့ Christian ဆေးရုံသို့ ရောက်ရှိလာခြင်းဖြစ်သည်ဟု DDK သတင်းတွင်ရေးသားထားသည်။

၎င်းတို့ (၃) အနက် အကြီးဆုံးဖြစ်သော ထွန်းထွန်းဆိုသူသည် လက်မောင်းတွင်ဒဏ်ရာရရှိပြီး ဒဏ်ရာပြင်းထန်ခြင်းကြောင့် လောင်တလိုင်တွင် ကုသရန်မဖြစ်နိုင်သည်အတွက် မြို့တော် အိုင်ဇောလ်ဘက်သို့ ပို့ဆောင်ကြသည်ဟု သိရသည်။

ကျန် ၂ ဦး၏ အခြေအနေမှာ မစိုးရိမ်ရကြောင်း ၎င်းတို့ကို အာသံတပ်ဖွဲ့မှ အနီးကပ်စောင့်ကြည့်လျက်ရှိပြီး မီဇိုရမ်ပြည်နယ်သို့ တရားမ၀င် ၀င်ရောက်လာမှုဖြင့် လောင်တလိုင်ရဲစခန်း မှ အမှုဖွင့်ထားသည်ဟု သိရှိရသည်။

ရက္ခိုင့်တပ်မတော် နှင့် မြန်မာ့တပ်မတော်တို့သည် ယခုလဆန်းပိုင်းကစတင်ပြီး ချင်းပြည်နယ် ပလက်ဝဒေသတွင် တိုက်ပွဲများပြန်လည်ဖြစ်ပွားနေပြီး အဆိုပါတိုက်ပွဲကြောင့် ဒေသခံပြည်သူ ၃၀၀ ကျော် ထွက်ပြေးတိမ်းရှောင်နေကြရသည်။

Share.

About Author

Leave A Reply

*

code