ခိုင်ကမ်းမြို့အ၀င် မုဒ်ဦး တည်ဆောက်မည့်အစီစဉ် ဆိုင်းငံ့ထား

0

စစ်ကိုင်းတိုင်းဒေသကြီးနှင့် နယ်စပ်မြို့ဖြစ်သည့် ချင်းပြည်နယ် ဖလမ်းခရိုင် ခိုင်ကမ်းမြို့အ၀င် ဆိုင်းဘုတ်(မုဒ်ဦး) တည်ဆောက်မည့်အစီစဉ်ကို ပြန်လည်ဆိုင်းငံ့ထားသည်ဟု သိရသည်။

ခိုင်ကမ်းမြို့အ၀င်မုဒ်ဦးတည်ဆောက်မည့်အစီစဉ်ကို ကလေးမြို့အခြေစိုက် အထက်ချင်းတွင်းလူငယ်များကွန်ယက်အဖွဲ့မှ ကန့်ကွက်မှုများရှိနေသည့်အတွက် အစကနဦးပိုင်းတွင် ခေတ္တရပ်ဆိုင်းထားပြီး ၂၀၁၇ ခုနှစ် ဒီဇင်ဘာလ ၁၅ ရက်နေ့က ချင်းပြည်နယ်စည်ပင်သာယာရေး၊ လျှပ်စစ်နှင့် စက်မှုလက်မှုဝန်ကြီး ဆလိုင်းအိုက်ဇက်ခင် နှင့် ပြည်နယ်စည်ပင်သာယာရေးအဖွဲ့ ညွန်ကြားရေးမှူးဦးထလာဟဲ တို့ကိုယ်တိုင် လာရောက်ပြီိး ပန္နက်တင်မင်္ဂလာအခမ်းအနားကျင်းပကာ မုဒ်ဦးတည်ဆောက်ရေးလုပ်ငန်းကို ဆက်လက်လုပ်ဆောင်သွားမည်ဟု ပြောဆိုခဲ့သည်။

သို့သော်လည်း မုဒ်ဦးတည်ဆောက်ရေးလုပ်ငန်း တင်ဒါအောင်ထားသည့် Land Nupa ကုမ္ပဏီကို တည်ဆောက်ရေး လုပ်ငန်းဆက်မလုပ်ရန် ချင်းပြည်နယ်စည်ပင်သာယာရေးအဖွဲ့မှ အကြောင်းကြားလာသည့်အတွက် လုပ်ငန်းကို ရပ်ဆိုင်းထားရသည်ဟု Land Nupa ကုမ္ပဏီပိုင်ရှင် ဦးခေါဘွေးကပြောသည်။

“ပန္နက်ရိုက်တော့ စည်ပင်ဝန်ကြီးကလည်း ဆက်လက်ဆောင်ရွက်လို့ရပြီ မြန်မြန်သာလုပ်လိုက်တော့လို့ ကျတော့ကိုပြော တယ်၊ ပြီးတော့ နောက်မနက်ကျတော့ ခိုင်ကမ်းစည်ပင်ကနေပြီးကျနော့ကို ဖုန်းပြန်ဆက်တယ်၊ မလုပ်တော့ဘူးတဲ့ နားမယ်တဲ့၊ တခြားလုပ်ငန်းလာလျှောက်ပါလို့ ကျနော့ကိုပြောလိုက်တယ် ဆိုတော့ တခြားလုပ်ငန်းလည်း ကျနော်မလျှောက်ချင်တော့ဘူး အဲဒါနဲ့ နားလိုက်တာပါပဲ’’ ဟု ဦးခေါဘွေးကပြောသည်။

မုဒ်ဦးတည်ဆောက်ရန် လိုအပ်သည့် ဆောက်လုပ်ရေးကိရိယာများကိုလည်း ကြိုတင် ၀ယ်ယူထားပြီးဖြစ်သည့်အတွက် ယခုစီမံကိန်းကို ဆက်မလုပ်တော့ပါက ကုမ္ပဏီအတွက် ရှုံးဆုံးနစ်နာနိုင်ပြီး ချင်းပြည်နယ်တာဝန်ရှိသူများအနေဖြင့် နယ်နိ မိတ်ကိစ္စကို ကောင်းကောင်းစီစစ်သင့်သည်ဟု ၎င်းကပြောသည်။

“ချင်းပြည်နယ်အစိုးရကနေပြီးမှ တရားဝင်ချမှတ်ထားတဲ့ တင်ဒါပါ၊ ကျနော်လည်းခုပြင်ဆင်ထားတာ သံချည်၊ သံကွေးတွေ အားလုံးပြီးထားပြီပြီ ပြန်မလုပ်ရတော့ဘူးဆိုရင် ကျနော်တော့ ရှူံးတော့ရှုံးဆုံးမှာပေါ့ ဒါပေမယ့် ဒါကအဓိကတော့မဟုတ်ဘူး ချင်းပြည်နယ်ရဲ့ နယ်နိမိတ်ကိုတော့ ၀န်ကြီးတွေအနေနဲ့ ကောင်းကောင်းစီစစ်ဖို့တော့ အရမ်းလိုအပ်တယ်လို့ ကျနော်မြင်တယ်ဗျ” ဟု ဦးခေါဘွေးကပြောသည်။

ခိုင်ကမ်းမြို့မိမြို့ဖတစ်ဦးဖြစ်သည့် ဦးရှယ်မှန် ပြည်နယ်အစိုးရအနေဖြင့် နဂိုချပေးတဲ့တင်ဒါအတိုင်း ဆက်လက်လုပ်စေလိုကြောင်း ပြောဆိုသည်။

“အစိုးရရဲ့လုပ်ရပ်ကမပြတ်သားဘူးလို့မြင်တယ်၊ ကိုယ်လုပ်မယ့် ချပြီးသားကို ပြန်ပြီးမလုပ်တော့ဘူး ဘာညာဆိုတာ မပြတ်သားဘူး၊ တင်ဒါနဲ့အစိုးရအသိအမှတ်ပြုနဲ့ ပုဂ္ဂလိကလုပ်ငန်းလုပ်တဲ့ကိစ္စမဟုတ်တဲ့အတွက် ပြီးရင် ပြည်သူလူထုကလည်း ကန့်ကွက်တာ တစ်ဦးတစ်ယောက်မှမရှိဘူး၊ လူမှုကွန်ယက်တစ်ခုက လာဂယက်ရိုက်သွားတာကလည်း ဘုမသိဘမသိနဲ့ ဂယက်လာရိုက်တဲ့ကိစ္စဖြစ်တဲ့အတွက် ကိုယ့်မြို့အ၀င် ၊ ပြည်နယ်အ၀င်လေး နယ်မြေသတ်မှတ်ချက်မဟုတ်ပေမယ့် ဆက်လုပ်သင့်တယ်လို့ပဲ ကျနော်တို့ကယူဆတယ်၊ လုပ်လည်းလုပ်စေချင်တယ်” ဟု ဦးရှယ်မှန်ကပြောသည်။

မုဒ်ဦးတည်ဆောက်ရေးဆိုင်းငံ့ထားသည့် ကိစ္စနှင့်ပတ်သက်၍ ချင်းပြည်နယ်စည်ပင်ဝန်ကြီး ဆလိုင်းအိုက်ဇက်ခင်ကတော့ စစ်ကိုင်းတိုင်းအစိုးရဘက်မှ ကမ်းလှမ်းလာသည့်အတွက်ကြောင့် နှစ်ဘက်ပြေပြေလည်လည်ဖြစ်စေရန် ခေတ္တစောင့်ဆိုင်း ခြင်းသာဖြစ်သည်ဟု ပြောသည်။

“ကလေးဘက်က လူတစ်ခုက ကန့်ကွက်တယ်ပေါ့ဗျာ ကန့်ကွက်တဲ့အချက်တွေက စစ်ကိုင်းတိုင်းအစိုးရဘက် ရောက်သွားတယ် စစ်ကိုင်းတိုင်းအစိုးရက ချင်းပြည်နယ်အစိုးရကို ဒီကိစ္စနဲ့ပတ်သက်ပြီးတော့ ပြည်သူလူထုကြား မှာ ထင်ယောင်ထင်မှားမဖြစ်စေဖို့အတွက် ဆောင်ရွက်ဖို့ဆိုပြီးတော့ ကမ်းလှမ်းလာတယ် အဲဒီတွက်ကြောင့်မို့လို့ လက်ရှိမှာ ကလေးခရိုင်အုပ်ချူပ်ရေးမှူးနဲ့ ဖလမ်းခရိုင်အုပ်ချူပ်ရေးမှူးနဲ့ သူတို့ပူးပေါင်းပြီးတော့ မုဒ်ဦးဆောက်မယ့်နေရာသည် ချင်းပြည်နယ်အတွင်းမှာရှိနေတယ်ဆိုတာကို စနစ်တကျပြန်ဖြစ်ဖို့လုပ်နေတယ် ခုမုဒ်ဦးဆောက်မယ့်နေရာသည် ချင်းပြည်နယ်မြေကြီးပဲ ချင်းပြည်နယ်အစိုးရအနေနဲ့ ဘာမှပြသနာမရှိဘူး ရွှေ့ဆိုင်းဖို့လည်းမရှိဘူး သို့သော် တခြားတိုင်းဒေသကြီးကနေပြီးတော့ ဒီကိစ္စနဲ့ပတ်သက်ပြီးတော့ သူတို့အထဲမှာ ကန့်ကွက်တဲ့ကိစ္စတွေရှိနေတော့ ကျနော်တို့ ချင်းပြည်နယ်အနေနဲ့ကတော့ ပြေပြေလည်လည်ဖြစ်စေချင်တယ် တကယ့်တကယ်တော့ ပြည်နယ်တစ်ခုရဲ့ သူ့နယ်နိမိတ်ထဲမှာ ဆောင်ရွက်တဲ့လုပ်ငန်းတစ်ခုပဲ အဲလိုအနေအထားမှာတော့ကန့်ကွက်လို့မရဘူး သို့သော်လည်းဘဲ ကျနော်တို့အနေနဲ့ နှစ်ဘက်ပြေပြေလည်လည်ဖြစ်နိုင်အောင်ဆိုပြီး ခဏစောင့်ထားပေးတဲ့သဘောပဲ ဖျက်သိမ်းလိုက်တာ မဟုတ်ပါဘူး” ဟု ၀န်ကြီးကပြောသည်။

စစ်ကိုင်းတိုင်းဒေသကြီး ကလေးမြို့နှင့် ထိစပ်နေသည့် ချင်းပြည်နယ် ခိုင်ကမ်းမြို့တွင် ၂၀၁၇-၁၈ ဘဏ္ဍာရေးနှစ် ငွေလုံးငွေရင်းရန်ပုံငွေ ကျပ်သန်း ၂၀ ဖြင့် မြို့အ၀င် ဆိုင်းဘုတ်ဆောက်လုပ်ရန် LANDNUPA ကုမ္ပဏီမှ လုပ်ငန်းလုပ်ကိုင်ခွင့်ရရှိထားခြင်းဖြစ်သည်။

Share.

About Author

Leave A Reply

*

code