ရခိုင်ပြည်နယ်တွင် ခရစ်ယာန်ပါစတာတစ်ဦး ရိုက်နှက်ခံရ

0

ရခိုင်ပြည်နယ် အမ်းမြို့နယ် ဟင်းရွက်ကျေးရွာတွင် သာသနာပြု နေသော ခရစ်ယာန်ပါစတာ ဦးတင်ဆွေသည် သြဂုတ်လ ၁၂ ရက်နေ့က ဒေသခံဗုဒ္ဓဘာသာဝင် များ၏ ရိုက်နှက်ခံရမှုကြောင့် သတိလစ်မေ့မျောပြီး အမ်းမြို့ဆေးရုံသို့ တင်ထားရသည်ဟု သိရသည်။

အမ်းမြို့မှ (၂၂)မိုင်လောက်ကွာဝေးသော မွှားအုပ်စု ဟင်းရွက်ကျေးရွာတွင် သတင်းကောင်းအသင်းတော် ပါစ္စတာလည်းဖြစ် သုခမြန်မာသာသနာ အဖွဲ့ရဲ့ ရခိုင်ပြည်နယ် Field Leader လည်းဖြစ်သူ ပါစတာဦးတင်ဆွေသည် အသင်းသူအသင်းသားများနှင့် မိတ်သဟာရပြုရန်အတွက် သွားရောက်စဉ် ဒေသခံဗုဒ္ဓဘာသာဝင် ရွာသားများက အုပ်စုဖွဲ့ ၀ိုင်းရိုက်နှက်ခံခဲ့ရခြင်းဖြစ်သည်ဟု ဦးတင်ဆွေနှင့်သာသနာပြုနေသည့် မမာမာဝင်းက ခိုနူမ်းသုန်သတင်း ဌာနကိုပြောပြသည်။

“ဒီအပတ်တနင်္ဂနွေနေ့ကပဲ ဟင်းရွက်ရွာကို သွားတယ် အဲဒီမှာ အသင်းလူကြီးအိမ်မှာထမင်းစားနေတဲ့အချိန်မှာ ပဒေကြော နဲ့ ဟင်းရွက်ရွာသားတွေကလာတယ် ဟင်းရွက်မှာက ကျမတို့ သင်းအုပ်ဆရာ ၂ အိမ်ရှိတယ် အဲဒီအိမ်ကိုဖျက်ရ မယ် လိုက်ခဲ့ဦးဆိုပြီးခေါ်တယ် ဆရာဦးတင်ဆွေကလည်း မလိုက်ဘူး အဲဒါနဲ့ သင်းအုပ်ဆရာနေအိမ်ကိုလည်း ဖျက်တယ် ပြီးတော့ ဒီရွာမှာ ခရစ်ယာန်ဓမ္မဆရာတွေမလာရဘူးဆိုတာ သိရဲ့သားနဲ့ ဘာလို့လာတာလဲဆိုပြီး ပြောတယ်၊ အိမ်ထဲဝင်ပြီး ဆရာ့ကို တခါတည်းရိုက်နှက်ကြတာ’’ ဟု မမာမာဝင်းက ပြောသည်။

ရွာသားများရိုက်နှက်မှုကြောင့် ဦးတင်ဆွေသည် ဦးခေါင်းတွင် ၄ ချက် ချူပ်ရပြီး ဘယ်ဖက်နားရွာက်ထဲရောင်ကာ ညာဖက်မျက်စေ့အောက်တွင် ညှိမဲဒဏ်ရာရရှိကြောင်းသိရသည်။ ဦးတင်ဆွေသည် ဦးခေါင်းတွင်ရရှိသော ဒဏ်ရာများကုသ ရန်အတွက် အမ်းမြို့မှ ရန်ကုန်မြို့သို့ ယနေ့ထွက်ခွါသွားသည်ဟု သူမကဆက်ပြောသည်။

ဟင်းရွက်ရွာတွင်ရှိသော သင်းအုပ်ဆရာ၏ နေအိမ်တစ်အိမ်ကိုလည်း ရွာသားများက ဖျက်ဆီးလိုက်ကြသည့်အပြင် ရွာထဲတွင်ရှိသော ယုံကြည်သူခရစ်ယာန်မိသားစုများသည်လည်း ကြောက်လန့်ပြီး ထွက်ပြေးတိမ်ရှောင်နေကြရသည်ဟု သိရသည်။ ယင်းကဲ့သို့ အုပ်စုလိုက် နေအိမ်ဖြိုဖျက်သည့်အချိန်တွင် တာဝန်ကျ ရဲသားများရှိနေသောလည်း တစ်စုံတစ်ရာ ဟန့်တားမှုမရှိကြောင့် မမာမာဝင်းကပြောသည်။

ပြီးခဲ့သည့် ဇူလိုင်လဆန်းပိုင်းတုန်းကလည်း ရခိုင်ပြည်နယ် အမ်းမြို့နယ် ပဒေကြောကျေးရွာတွင် သာသနာပြုဓမ္မဆရာမ နှစ်ဦးကို ဒေသခံများက ၀ိုင်းရိုက်သည့်ဖြစ်ရပ်တစ်ခု ဖြစ်ပွားခဲ့သေးသည်။

Share.

About Author

Leave A Reply

*

code