ချင်းလူမျိုးများ ခိုလှုံတဲ့ ကျေးရွာ ဖြိုဖျက်ခံလိုက်ရပြန်ပြီ

0

ယခင်စစ်အစိုးရရဲ့ စစ်အာဏာရှင် အုပ်ချုပ်မှုစနစ်အောက်မှာဖိနှိပ် ချုပ်ချယ်ခံရသည် သာမက နေ့စဉ်နဲ့အမျှ စားဝတ်နေ ရေးအခက်အခဲတွေ ကနေရုန်းထွက်နိုင်ဖို့ ချင်းလူမျိုးတွေ နယ်စပ်ဖြတ်ကျော်ပြီးတော့ သွားရောက်ခိုလုံနေရတဲ့ အိန္ဒိယ-မြန်မာနယ်စပ် မီဇိုရမ်ဘက် ကမ်းမှာတည်ရှိတဲ့ ဆိုင်းခုမ်ဖိုင်း ဆိုတဲ့ကျေးရွာ ဖြိုဖျက်ခံလိုက်ရပြန်ပြီ။


မီဇိုရမ်ပြည်နယ်အစိုးရက နိုင်ဝင်ဘာလ ဒုတိယပတ်အတွင်းမှာ အမှန်တကယ်ဘဲ ဖြိုဖျက်လိုက်တာပါ။ အခုလို ချင်းလူမျိုးအများစု နေထိုင်ရာ Sai khumphai ကျေးရွာ ဖျက်သိမ်းခံရတဲ့ အကြောင်းရင်းနဲ့ပတ်သက်လို့ Vaphai ကျေးရွာ Joint Action Committee ရဲ့ အကြောင်းပြချက်တွေကတော့ (၁) Vaphai ကျေးရွာဟာ အစိုးရက တပ်ချထားမှုမရှိတာကြောင့် မူးယစ်ဆေးဝါး၊ လက်နက်တွေ အဓိကတင်သွင်းရာ ဒေသတခုဖြစ်လာတယ်၊ ဆိုင်းခုမ်ဖိုင်းကျေးရွာမှာ မြန်မာနိုင်ငံသားတွေ(ချင်းလူမျိူး) တဖြည်းဖြည်းများလာပြီး မကောင်းမှု ဒုစရိုက်ကျူးလွန်တဲ့ မြန်မာနိုင်ငံသားအချင်းချင်းကို ဖုံးဖိကာကွယ်ပေးလေ့ရှိတယ်။
(၂) မြန်မာနိုင်ငံသား(ချင်းလူမျိုးတွေဟာ) လုပ်ငန်းအတည်တကျမရှိဘဲနဲ့ Saikhumphai ကျေးရွာကို ပြောင်းရွှေ့လာကြ သူတွေဖြစ်ပြီး သဘာဝ သစ်တောတွေကိုလည်း အချိန်မတန်ခင် ခုတ်လှဲလေ့ရှိတာကြောင့် သစ်တော ဖြုန်းတီးမှုဖြစ် လာစေနိုင်တယ်။(၃) ကျေးရွာအာဏာပိုင်တွေက မြစ်ချောင်းတွေမှာ ငါးမိုင်းခွဲခြင်း၊ Dynamo နှင့် ငါးဖမ်းခြင်း၊ အဆိပ်ရည် နှင့် ငါးဖမ်းမှု တွေမလုပ်ဖို့ တားမြစ်တဲ့ကြားထဲမှာ ဆက်လက်လုပ်ဆောင်နေကြတာကြောင့် ရေသတ္တ၀ါတွေမျိုးပြုန်းစေတယ်၊

(၄) သူတို့(မြန်မာနိုင်ငံသားချင်းလူမျိုး)ရဲ့ မကောင်းသော လုပ်ရပ်တွေကို သိနေပေမယ့် မိမိတို့ကျေးရွာ(Vaphai) နှင့် အလှမ်းဝေးတာကြောင့် မိမိတို့အနေနဲ့ အနီးကပ်စောင့်ကြည့်မနေနိုင်ဘူး။ ဆိုပြီး အချက် ၄ ချက်ပါရှိတယ်။

အမှန်တကယ် သမိုင်းကြောင်းကို လေ့လာကြည့်မယ်ဆိုရင် ဆိုင်ခုမ်ဖိုင်းကျေးရွာဟာ မီဇိုရမ်ပြည်နယ်အတွင်းမှာတည်ရှိ ပြီး အိန္ဒိယ-မြန်မာနယ်စပ်လမ်းကြောင်းပေါ်မှာတည်ရှိတဲ့ ကျေးရွာပါ။ သူတို့ဟာ Vaphai ကျေးရွာကောင်စီအုပ်ချူပ်မှု အောက်မှာ နေထိုင်နေကြရတာဖြစ်ပါတယ်။

လွန်ခဲ့တဲ့ ၁၉၆၃ ခုနှစ်ကတည်းကစပြီး မြန်မာနိုင်ငံဘက်ကနေ ချင်းလူမျိုးတချို့ စတင်ပြောင်းရွှေ့လာကြတာဖြစ်ပြီး Vaphai ကျေးရွာကောင်စီအဖွဲ့ကလည်း အသိအမှတ်ပြုပြီး နေထိုင်ခွင့်ပြုထားခဲ့တာပါ။ချင်းလူမျိုးတွေဟာ အဲဒီကျေး ရွာမှာနေထိုင်ပြီး တောင်ယာလုပ်ငန်းတွေကို
အငှားနဲ့လုပ်ကိုင်ကြကာအသက်မွေးဝမ်းကြောင်းခဲ့ကြတာလို့သိရပါတယ်

မြန်မာနိုင်ငံမှာ စားဝတ်နေရေးအခက်ခဲတွေကြောင့် အဲဒီကျေးရွာကို ပြောင်းရွှေ့လာတဲ့ ချင်းလူမျိူးတွေ တဖြည်းဖြည်း များပြားလာခဲ့ပါတယ်။ အိမ်ခြေ ၅၀ ကျော်အထိရှိလာခဲ့ပါတယ်။ နောက်ပိုင်းမှာတော့ အခြေခံမူလတန်းကျောင်းတွေပါ ရှိလာပြီး သူတို့သားသမီးတွေ
ပညာသင်ကြားနိုင်ခဲ့ကြတဲ့အထိဖြစ်လာခဲ့ပါတယ်။

Saikhumphai ကျေးရွာ ဖျက်သိမ်းဖို့ Vaphai ကျေးရွာ JAC ရဲ့ အကြောင်းပြချက်တွေအပေါ် Saikhumphai ကျေးရွာမှာနေ ထိုင်တဲ့ ချင်းအမျိုးသားတဦးကတော့ လုံးဝ ငြင်းဆန်ထားပါတယ်။

“ ဒီကျေးရွာမှာ ဘယ်သူမှ မူးယစ်ဆေးဝါးရောင်းဝယ်တဲ့သူမရှိပါဘူး၊ ကုန်သည်တွေ စီးပွားရေးသမားတွေလည်း မရှိကြ ပါဘူး၊ လက်လှုပ်မှ ပါးစပ်လှုပ်ရတဲ့ တောင်ယာသမားတွေပါ’’ လို့ ပြောဆိုပါတယ်။

ဒါပေမယ့် Vaphai ကျေးရွာ JAC အဖွဲ့ကတော့ ပြီးခဲ့တဲ့ အောက်တိုဘာလ ၃၁ ရက်နေ့ နောက်ဆုံးထားပြီး Saikhumphai ကျေးရွာနေ အိန္ဒိယနိုင်ငံသားမဟုတ်တဲ့သူတွေကို မီဇိုရမ်ပြည်နယ်အစိုးရက မမောင်းထုတ်ဘူးဆိုရင် Vaphai ကျေးရွာလူထုအားနဲ့ ဖျက်သိမ်းတော့မယ်လို့
အသိပေးခဲ့ပါတယ်။

ဒါကြောင့် နိုဝင်ဘာလဆန်းပိုင်းကဘဲ ချင်းလူမျိုးလူဦးရေ ၈၀ ခန့်ကို ကျေးရွာကနေ မောင်းထုတ်လိုက်ကြပြီး သူတို့နေ ထိုင်ခဲ့တဲ့အိမ်တွေကိုလည်း ချိတ်ပိတ်ထားလိုက်ပါတယ်။

မီဇိုရမ်အစိုးရရဲ့ အစီအစဉ်နဲ့ အဲဒီကျေးရွာမှာ ကျန်ရှိနေကြတဲ့ အိန္ဒိယနိုင်ငံသားအဖြစ် အသိအမှတ်ပြုခံရသူတွေကို Vaphai ကျေးရွာမှာ ပြောင်းရွှေ့နေရာချထားပေးမှာဖြစ်ပြီး တအိမ်ထောင်ကို ရူပီး သုံးသောင်းစီကူညီပေးမယ်လို့ လည်း ကြားသိရပါတယ်။

ကြည့်ရှူကူညီထောက်ပံ့ပေးမယ့်သူမရှိကြတဲ့ မောင်းထုတ်ခံရတဲ့ ချင်းလူမျိုးတွေကတော့ နီးစပ်ရာ ကျေးရွာတွေ သွားရောက် နေထိုင်ကြရသလို၊ တောင်ယာထဲက တဲအိမ်ကလေးတွေမှာ နေထိုင်နေကြရပါတယ်။

“ ဒီဖြစ်ရပ်ဟာ အိန္ဒိယနိုင်ငံသားမဟုတ်ကြတဲ့ ချင်းလူမျိူးအတွက် အမှန်တကယ် တုန်လှုပ်ခြောက်ခြားစရာတခုပါ၊ သူတို့ နောက်ထပ် ဘယ်ဒေသ၊ ဘယ်နေရာကိုများ သွားရောက်ခိုလှုံကြမလဲဆိုတာ စဉ်းစားစရာကိစ္စကြီးကြီးတရပ်ဖြစ် နေမှာအမှန်ပါ’’ လို့ အဲဒီကျေးရွာကို ကိုယ်တိုင်သွားရောက်လေ့လာခဲ့တဲ့ ချင်းလူမျိုးတဦးက ပြောပြခဲ့ပါတယ်။

Share.

About Author

Comments are closed.